Inleiding

Die Nasionale Raad van FEDSAS erken die behoefte aan ’n reglement soos wat die Kode van Beheerbeginsels vir Suid-Afrika, 2009 (‘King III’) aanbeveel. Hierdie Reglement is onderworpe aan die bepalings van die grondwet van FEDSAS en enige toepaslike wet of regulatoriese bepaling. 

Doel van die Reglement

Die doel van hierdie Reglement is om die Nasionale Raad se rol en verantwoordelikhede sowel as die vereistes vir sy samestelling en vergaderings uiteen te sit.

Samestelling

Die Nasionale Raad bestaan uit ’n ewewig van uitvoerende en nie-uitvoerende lede, met ’n meerderheid nie-uitvoerende lede. Die meeste van die nieuitvoerende lede is onafhanklik. 

Lede van die Nasionale Raad word deur ’n formele proses aangestel, en die benoemingskomitee help om geskikte kandidate uit te wys om by die algemene jaarvergadering voor te stel. 

Die uitvoerende hoof en adjunk- uitvoerende hoof is ex officio-lede van die Nasionale Raad.

’n Formele oriënteringsprogram is met die oog op nuwe lede van die Nasionale Raad ontwikkel. Onervare lede word deur middel van ’n mentorprogram touwys gemaak.

Daarbenewens word voortgesette professionele ontwikkelingsprogramme in werking gestel wat verseker dat Raadslede gereelde inligting oor veranderinge in risiko’s, wette en die omgewing ontvang. 

Rol en verantwoordelikhede

Die rol en verantwoordelikhede van die Nasionale Raad is: 

1. om as kern en beskermheer van korporatiewe beheer op te tree deur sy verhoudings met die bestuur en belanghebbendes van FEDSAS ooreenkomstig goeie korporatiewe beheerbeginsels te bestuur; 
2. om te verstaan dat strategie, risiko, prestasie en volhoubaarheid onskeibaar is, en om daaraan uitvoering te gee deur: 
   • tot strategie by te dra en dit goed te keur; 
   • behoorlik seker te maak dat die strategie en sakeplanne nie aanleiding gee tot risiko’s wat die bestuur nié na behore beoordeel het nie; • kernprestasiegebiede en -risiko’s te bepaal; 
   • te verseker dat die strategie tot volhoubare uitkomste sal lei; en 
   • volhoubaarheid as ’n sakegeleentheid te beskou wat strategieontwikkeling rig;
3. om doeltreffende leierskap op grond van etiese beginsels te voorsien; 
4. om te verseker dat FEDSAS ’n verantwoordelike korporatiewe burger is én so beskou word, deur nie net ag te slaan op die finansiële aspekte van FEDSAS-bedrywighede nie, maar ook die uitwerking van sy sakebedrywighede op die omgewing en die samelewing waarin hy funksioneer; 
5. om te verseker dat FEDSAS-etiek doeltreffend bestuur word;
6. om te verseker dat FEDSAS oor ’n doeltreffende en onafhanklike ouditkomitee beskik; 
7. om verantwoordelik te wees vir risikobeheer; 
8. om verantwoordelik te wees vir inligtingstegnologie- (IT-)beheer; 
9. om te verseker dat FEDSAS aan toepaslike wette voldoen, en ook voldoening aan nie-bindende reëls en standaarde oorweeg; 
10. om ’n doeltreffende, risikogegronde interne oudit te verseker; 
11. om te verstaan dat belanghebbendes se opvattings FEDSAS se reputasie kan beïnvloed; 
12. om die integriteit van FEDSAS se geïntegreerde verslag te verseker; 
13. om in belang van FEDSAS op te tree deur te verseker dat individuele direkteure:
    • aan regstandaarde vir gedrag voldoen; 
    • by magte is om deur middel van ’n vasgestelde prosedure onafhanklike advies met betrekking tot hul pligte in te win; en 
    • werklike of veronderstelde belangebotsings aan die Nasionale Raad bekend maak, en om dit dan dienooreenkomstig te hanteer;
14. om met ondernemingsredding te begin sodra FEDSAS in finansiële nood verkeer; 
15. om ’n onafhanklike nie-uitvoerende direkteur as voorsitter van die Nasionale Raad te kies; en 
16. om die uitvoerende hoof aan te stel en sy/haar prestasie te beoordeel

Die Nasionale Raad behoort alles te doen wat nodig is om bogenoemde rol te vervul. 

Delegasie

Die Nasionale Raad delegeer bepaalde bevoegdhede aan goed gestruktureerde komitees, maar sonder om sy verantwoordelikhede af te skuif. Delegasie geskied formeel en behels die volgende:

1. Formele opdragte word vir elke komitee van die Nasionale Raad opgestel en goedgekeur. 
2. Die komitees se opdragte word een maal per jaar hersien. 
3. Die komitees word toepaslik saamgestel, met behoorlike inagneming van die vaardighede wat elke komitee vereis. 
4. Die Nasionale Raad stel ’n raamwerk op vir die delegasie van bevoegdheid aan die bestuur. 

Gereeldheid van vergaderings

Die Nasionale Raad moet genoeg geskeduleerde vergaderings hou om ál sy pligte soos dit in hierdie Reglement uiteengesit word, na te kom, dog onderworpe aan ’n minimum van twee vergaderings per jaar. 

Vergaderings benewens dié wat geskeduleer is, kan op aandrang van ’n lid van die Raad gehou word. 

Die voorsitter van die Nasionale Raad kan voor ’n Raadsvergadering met die uitvoerende hoof en adjunk- uitvoerende hoof en/of die sekretaris ontmoet om belangrike kwessies te bespreek en oor die agenda ooreen te kom.

Bywoning van vergaderings

Lede van die senior bestuur, sekerheidsverskaffers en professionele raadgewers kan vergaderings slegs op uitnodiging bywoon en het geen stemreg nie. 

Lede van die Nasionale Raad moet alle geskeduleerde Raadsvergaderings, met inbegrip van ad hoc-vergaderings oor spesiale sake, bywoon, tensy ’n verskoning vergesel van redes vooraf by die voorsitter of sekretaris ingedien word. 

Die sekretaris is nie ’n lid van die Nasionale Raad nie, maar dien as skriba vir alle verrigtinge van die Raad. 

Indien die benoemde voorsitter van die Nasionale Raad nie ’n vergadering kan bywoon nie, moet die ondervoorsitter as voorsitter waarneem. 

Agenda en notule

Die Nasionale Raad moet jaarliks ’n werkplan opstel om toe te sien dat die agendas van die beplande vergaderings vir die jaar alle tersaaklike aangeleenthede dek. Die jaarplan moet verseker dat die sake wat in hierdie Reglement uiteengesit word, behoorlik aandag ontvang: Kritieke sake sal jaarliks aan bod kom, terwyl ander sake dalk net op ’n rotasiegrondslag oor drie jaar bespreek word. Die getal, tydsberekening en duur van vergaderings sowel as die agendas sal ooreenkomstig die jaarplan bepaal word. 

’n Uitvoerige agenda tesame met stawende dokumente moet minstens ’n week voor elke vergadering aan die lede van die Nasionale Raad en ander genooides voorsien word. 

Lede van die Nasionale Raad moet behoorlik vir Raadsvergaderings voorberei ten einde toepaslike en konstruktiewe bydraes te lewer oor sake wat bespreek word. 

Die notule moet so gou moontlik ná die vergadering afgehandel en vir hersiening aan die voorsitter en Raadslede gestuur word. Die Nasionale Raad moet die notule formeel by sy volgende geskeduleerde vergadering goedkeur. 

Kworum

’n Verteenwoordigende kworum vir vergaderings is soos wat die grondwet van FEDSAS bepaal. 

Individue wat vergaderings van die Nasionale Raad op uitnodiging bywoon, kan aan gesprekke deelneem, maar maak nie deel uit van die kworum vir Raadsvergaderings nie.

Prestasiebeoordeling

Prestasiebeoordeling van die Nasionale Raad, sy komitees en individuele lede, met inbegrip van die voorsitter, moet jaarliks geskied.

Goedkeuring van hierdie Reglement

Hierdie Reglement is op 16 Maart 2013 deur die Nasionale Raad goedgekeur.

Laai die hele dokument af