Die nuwe Minister van Onderwys, Siviwe Gwarube, sal eerstens en deurlopend stabiliteit na die onderwyssektor moet bring. Dit is die sleutel tot sukses vir enige ander doelwitte in dié fundamenteel belangrike sektor.

“FEDSAS verwelkom Minister Gwarube se aanstelling en vra dat sy ’n behoorlike geleentheid gegun word om haarself te bewys,” sê dr. Juané van der Merwe, adjunkhoof van FEDSAS (die Federasie van Beheerliggame van Suid-Afrikaanse Skole). FEDSAS hoop dat die minister se ampstermyn gekenmerk sal word deur besliste optrede teen sistemiese kwessies soos swak leeruitkomste, onderwysers wat nie na wense presteer nie, korrupsie en kader-ontplooiing.

Van der Merwe sê vennootskappe met rolspelers is belangrik vir deurlopende sistemiese veranderinge. “Langtermynverbetering van onderwysuitkomste berus op die inkoop van vakbonde, beheerliggaamorganisasies, skoolgemeenskappe en ander rolspelers.” 

FEDSAS het hoë verwagtinge van die minister in die aanspreek van uitdagings in onderwys. “Die uitdagings is baie maar dit is gelukkig duidelik wat hierdie uitdagings is. Basiese probleme moet eerste aangespreek word. Dit sluit onder meer in die verbetering van leesvaardighede van leerders, die aanstel van spesialisopvoeders en terapeutiese dienste by skole en skoolkapasiteit, met ’n spesifieke fokus op kleiner getalle per klaskamer in die grondslagfase. Die bevordering van inklusiwiteit en billikheid is nodig sodat alle leerders toegang het tot gehalte-onderrig, ongeag hul agtergrond.”

Van der Merwe sê data-gedrewe besluite en ’n bekwame leierskapspan is nodig om hierdie probleme aan te spreek. “Daar is nie plek vir politiek in die onderwyssektor nie. Die beste belang van elke kind moet te alle tye die eerste oorweging wees. Wanfunksionele provinsiale onderwysdepartemente en onbevoegde amptenare was nog altyd struikelblokke op die pad na gehalte-onderrig. Sterk leierskap van Minister Gwarube is hier nodig.”

Net soos onderwysamptenare moet onderwysers ook aanspreeklik gehou word, veral ten opsigte van hoë koerse van onderwyserafwesigheid en swak prestasie. Van der Merwe sê ’n besliste fokus op onderwyseropleiding en -ondersteuning is nodig. “Ons verwag van die minister om streng en deurlopende professionele ontwikkelingsprogramme te implementeer om toe te sien dat onderwysers oor die nodige inhoudskennis en pedagogiese vaardighede beskik.”

FEDSAS se benadering berus op samewerking. “Die organisasie het ’n omvattende bloudruk ontwikkel wat kwessies soos die verbetering van skoolinfrastruktuur, die veiligheid en welstand van leerders en die versterking van skoolbestuur en leierskap aanspreek. FEDSAS is gereed om die minister met uitgebreide kundigheid by te staan.”

Van der Merwe sê soos met vorige ministers van onderwys is FEDSAS verbind tot betekenisvolle dialoog met Minister Gwarube. “Ons sien uit na ’n samewerkende en produktiewe vennootskap. Benewens die uitdagings is daar ook wonderlike geleenthede in die onderwyssektor en FEDSAS is gretig om saam met die minister te werk om die onderwyssektor te verbeter. As mondstuk van beheerliggame sal FEDSAS egter ook nie huiwer om op te tree om die belange van sy lede, en uiteindelik ook die belange van leerders, te beskerm nie.”